सुमारगड

सुमारगड ह्या किल्ल्याची समुद्र सपाटीपासून ऊंची २००० फुट आहे.  हा किल्ला रत्नागिरी जिल्ह्यामध्ये येतो. सुमारगड किल्ल्याचा प्रकार गिरीदुर्ग असून तो महाबळेश्वर कोयना डोंगररांगे  मध्ये येतो आणि त्याची श्रेणी कठीण आहे.

                सुमारगड हा नावाप्रमाणेच "सुमार" आहे. ‘उगवतीच्या कड्यावर एका झाडाला धरून वर येंगाव लागतं.‘ असा गोनीदांनी या किल्ल्याबद्दलच्या वर्णनात म्हटलेले आहे. रसाळगड आणि महिपतगड यांच्या बरोबर मध्ये हा किल्ला येतो. आजुबाजूला असणारे जंगल आणि किल्ल्यावर जाण्यासाठी असणारी अवघड वाट यामुळे किल्ला फारच दुर्लक्षित झालेला आहे.

गडावरील पाहण्यासाठी ठिकाणे:

किल्ल्यावर वर पोहोचल्यावर समोरच पाण्याची दोन टाकी आहेत. टाक्यांच्या पोटातच एक गुहा आहे. यात शिवाची पिंड आणि देवीची मूर्ती आहे. पाण्याच्या टाक्यांच्या उजव्या अंगास थोडे वर गेल्यावर एकखांबी पाण्याचे टाके लागते. एक वाट समोरच्या टेकाडावर जाते तर, दुसरी टेकाडाला वळसा घालून पुन्हा टाक्यांपाशी येते. समोरच्या टेकडीला वळसा मारताना एका ठिकाणी दगडमातीने बुजलेली गुहा दिसते. या गुहेत दोन खोल्या आहेत. मात्र यात बर्‍याच मोठ्या प्रमाणावर माती जमा झालेली आहे. गडमाथा फारच लहान असल्यामुळे गडफेरीस अर्धा तास पुरतो.

गडावर जाण्यासाठी वाटा:
सुमारगडावर जाण्यासाठी महिपत गडावरून वाडीबेलदार या गावात न उतरता उलट्या दिशेने खाली उतरावे. वाटेत धनगराची दोन तीन घरे लागतात. येथून थोडे खाली उतरल्यावर एक ओढा लागतो, तो पार करून समोरचा डोंगर चढावा, पुढे अर्ध्या तासातच आपण एका खिंडीपाशी पोहोचतो. खिंडीतून डावीकडे वर चढणारी वाट थेट सुमारगडावर घेऊन जाते. या वाटेने पुढे गेल्यावर थोड्याच वेळात आपण एका कड्यापाशी पोहोचतो. कड्याला लागूनच वाट पुढे जाते. पुढची वाट अवघड आहे. जवळ रोप असल्यास फारच उत्तम, खिंडीपासून किल्ल्यावर जाण्यास पाऊण तास लागतो. रसाळगडावरून सुमारगडाकडे यायचे झाल्यास वाटेत एक राया धनगराचा झाप लागतो. मात्र रसाळगड ते सुमारगड हे अंतर साडेचार तासांचे आहे.

जेवणाची सोय: गडावर जेवणाची सोय नाही आपण स्वतः करावी.

पाण्याची सोय: पिण्याचे पाणी बारामही उपलब्ध आहे.

राहण्याची सोय: गडावर राहण्याची सोय नाही.

जाण्यासाठि लागणारा वेळ: महिपतगडा मार्गे अडीच तास.